Wenn`m vön`n Düwel spräck...
Is de Klaonenkasper wiér modern?
....
 In lester Tiet kann man ümmer wier metkriegen, dat bi 'ne gewisse Sorte vön junge Menschken de Düwel eene leige Mode wuorden is. Du kaas häören off liäsen, dat so 'ne aislike Doherie äs "Satanskult" heel modern is. Dao fiert junge Lüde Düwelsmis-en un makt gruselige Dinge up Kiärkhüöfe. Wat gaas abscheilik is: In Düwels Namen wärt sogar Verbriäken makt. Man denkt sick, wat dao wull alles ächter sitt? Daobi is et vöndage so, dat, de Theologen sick nich äs gaas ennig sint, off et so'n Wiesen äs dän Klaonekasper üöwerhaups giff. De eenen vön düsse gelährten Härns meint ümmer no, dat et düssen Schwatten ümmer no liäwt. Annere daovön meint et: Dän Düwel harr et niun nümmers giewen, he was bloß de schlechte Siete vön den menschlike Siäl. Wu dat nu auk wull sien magg! Ick häff äs üöwerleggt, wu usse Vüöröllern met düsse Spookgestalt ümgaohn sint. Dat kann man jä wull an de plattdütschke Spraoke affliäsen. Baol jedereen kennt vöndage no dat Waort: "Wenn'm vön'n Düwel spräck, dann sitt he upt Heck!" Dao sitt de Angst ächter, dat man nich äs sienen Namen harre seggen doff. Man gloff, dann is he de! Man gloff, de Düwel was so'n Wierspiel Kärlken vön ussen Härguott. Daorüm was he bi Fierdage heel aktiv. Twe Wäörde daoför: "Je hilliger de Tiet, je gluersker de Düwel!" un "Vüör Veerhaugtieten geiht de Düwel up Stelten!" Ich häff no Lüde kannt, de dat fast gloffen. Dat de Klaonenkasper auk met de Schlechtigkeit vön Menschken to dohn haäff, seggt düsse Sprüekwäörde: "För Geld kaas'n Düwel danzen seihn!" Vön eenen schlechten Menschken sagg man wull, he "Häff'n Düwel in'n Nacken!". So ähnlik is de Andütung, de in düt Waort ligg: "He küert vön'n Düwel, un ment dir" Ut de Tiet vön dat Verbriänen vön Hexen gloff man sogar no, da! Fraulüde no äher äs Mannslüde wat met düssen lei gen Kärl to dohn harren. Dat wüer man vöndage villicht äher vön Mannslüde seggen. Män dat olle Sprüekwaort: "Sint Fraulüde an 't Backen, häbtse'n Düwel in'n Nacken!" weet dat ümmer no. Vön eerlenleigen Metmenschken sagg man auk wull: "De is de Düwel ut de Kiep' sprungen!"
No leiger äs de Klaonenkasper sall sien Schweigemoer sien. Et lütt dann so: "Wao de Düwel söwes nich hänkummen kann, dao schickt he si-ne Schweigemoer hän!"
Augstin Wibbelt was wisse eenen frommen Menschken. Mi is upfallen, dat he ümmer met'n Portion Spaß vön'n Düwel küerde. Man kann villicht so seggen: He harr de kinne Angst vüör. Daorüm drei nüdlike Sprüekwäörde, de ick bi düssen Dichter funnen häff: "Spaß mott sien, sagg de Düwel, dao kieddele he siene Beßmoder met de Fuork in de Ribben," -"Eenfak unnüdlik sagg de Düwel, dao harr he sienen Stiärt gröön anstireken." "Üm de Sake kuort to maken, sagg de Düwel, dao harr he siene Beßmoder dän Stiärt affkniepen!"
Sowiet Augstin Wibbelt! Aober Lüde passtup: Baol is Wiehnachten. Denkt an de Veerhochtieten! .
Willi Kamp
Bücher von Willi Kamp:
.......
" Präötken up Platt ut de Wannenmakerstadt "  Preis 4.90 €
" Dat Twedde Gesicht un annere Spöökerien  "   Preis 9.80 €

zu beziehen bei Willi Kamp